Federashon Dutch Caribbean Mental Health ta suprayá importansia di kolaborashon regional durante bishita di trabou na Boneiru
Kralendijk – E miembronan di federashon Dutch Caribbean Mental Health (DCMH) a reuní na Boneiru di 8 te ku 11 di yüni 2026. Durante e bishita di trabou akí, interkambio di konosementu, kolaborashon regional i e resultadonan preliminar di e di dos edishon di Regiobeeld GGZ Caribisch Gebied 2025 tabata sentral. Tambe a entregá e rapòrt di e investigashon GGZ Carib na e miembronan di DCMH.
Kolaborashon reforsá den e región
DCMH ta konsistí di FSMA Respaldo na Aruba, GGz Curaçao, Verslavingskliniek Brasami i PSI Skuchami na Kòrsou, Mental Health Foundation na Sint Maarten i Mental Health Caribbean (MHC) na Boneiru, Sint Eustatius i Saba. Durante e bishita di trabou, e representantenan di e diferente institushonnan di salú mental (GGZ) di e islanan a haña un rekorido na vários departamento di MHC.
Durante un reunion di kontenido riba 9 di yüni di 2026, a presentá i diskutí e resultadonan preliminar di Regiobeeld GGZ Caribisch Gebied 2025. E rapòrt akí ta duna un bista estadístiko di e kantidat di kliente den e sektor di salú mental riba e islanan i di nan kehonan mental mas importante. E miembronan di DCMH a duna feedback riba e resultadonan i a papia ku otro tokante kon por reforsá i garantisá e kolaborashon den region riba tereno di kolekshon di dato aun mas.
Durante e reunion akí, a entregá tambe e rapòrt GGZ Carib di Curaçao Biomedical and Health Research Institute (CBHRI) na e miembronan di DCMH. E investigashon akí ta brinda informashon balioso tokante e panorama di kuido di salú mental na Kòrsou i Boneiru. Ademas, durante e konferensia di kuido di Zorg en Jeugd Caribisch Nederland (ZJCN), DCMH a duna un presentashon i un tayer.
Bista regional salú mental área karibense
Pa di dos biaha, DCMH ta presentá un bista konhunto di salú mental riba e seis islanan karibense den Reino Hulandes. Durante e konferensia di kuido di ZJCN, a duna un promé bista di e resultadonan di Regiobeeld GGZ Caribisch Gebied 2025.
Pa e bista regional, a kolektá datonan di kasi 10.930 kliente, repartí riba seis isla. E resultadonan ta mustra, entre otro, kua kondishonnan i problema mental ta mas frekuente den e sektor di salú mental den e region.
Trastornonan sikótiko ta esnan ku ta mas frekuente. Esakinan ta kondishonnan kaminda hende por tin difikultat pa distinguí realidat for di nan mes pensamentunan. Por ehèmpel, nan por sufri di delusion òf halusinashon. Despues di esaki ta sigui trastornonan di desaroyo neurobiológiko, manera Attention Deficit Hyperactivity Disorder (ADHD) i autismo. E trastornonan akí hopi biaha ta visibel for di mucha i tin di aber ku e manera ku e cerebro ta desaroyá. Na di tres lugá ta problema sikososial, manera strès pa motibu di problema finansiero, problema na kas òf tenshon den famia.
E bista regional ta yuda e institushonnan di salú mental pa kolaborá mihó i pa koordiná e kuido mas bon ku loke hende mester.
Kolaborashon komo kondishon pa bon kuido
Durante e konferensia di kuido di ZJCN, Caroline Hart di Respaldo i Kathelijne van den Boogert di MHC a duna un presentashon na nòmber di DCMH tokante loke e federashon a logra den e último añanan. E mensahe sentral tabata:
“Kolaborá riba e islanan no ta un eskoho, sino un kondishon pa por brinda bon kuido.”
Ademas, DCMH a duna un tayer tokante kolekshon di dato den e region. Durante esaki, a diskutí kon a logra pa konhuntamente kolektá dato for di diferente sistema riba e diferente islanan i unda e oportunidatnan ta pa mehorá e kalidat di dato i e kontinuidat di e monitòr regional.
Ku e bista regional komun akí, DCMH ta duna un paso importante den hasi e nesesidatnan di kuido den e region mas visibel. Dor di konektá konosementu, sifra i eksperensia ku otro, e institushonnan di salú mental den e parti karibense di Reino Hulandes por sigui traha huntu pa un salú mental adekuá, aksesibel i prepará pa futuro.
Fin Komunikado
Rei ariba, d.l.p.r.: Angelica Dijk, Tameeka Lambert, Tineke Alberts, Kathelijne van den Boogert Caroline Hart, Denise Beeke, Kylee Perez, Miloushka Boekhoudt, Ghislaine Cijntje-Maduro, Hendrikus van Galen, Jan Kerssies
Rei abou, d.l.p.r.: Krista Oplaat, Jeroen Wisselink, Amy van der Linden
GGz Carib rapport Curaçao Biomedical Health Research Institute
d.l.p.r. Angelica Dijk, Ghislaine Cijntje-Maduro, Kathelijne van den Boogert, Izzy Gerstenbluth
Presentashon “Samenwerken is op de eilanden geen keuze, maar een voorwaarde voor goede zorg.” Duná pa Caroline Hart i Kathelijne van den Boogert